第十七回 别有心肠私讥老母 将何面目重责贤甥 (1)
按：张寿接了请客票头，径往公阳里周双珠家。踅进大门，只见阿德保正跷起脚坐在客堂里，嘴里衔一支旱烟筒。张寿只得上前，将票头放在桌上，说：“请洪老爷。”阿德保也不去看票头，只说道：“勿来里。放来里末哉。”张寿只得退出。阿德保又冷笑两声，响说道：“故歇也新行出来，堂子里相帮用勿着个哉！”
张寿只做不听见，低头急走。刚至公阳里弄口，劈面遇着洪善卿。张寿忙站过一旁，禀明姚老爷请。洪善卿点头答应，张寿乃自去了。
洪善卿仍先到周双珠家，在客堂里要票头来看过，然后上楼。只见老鸨周兰正在房里与周双珠对坐说话。善卿进去，周兰叫声“洪老爷”，即起身向双珠道：“还是耐去说俚两声，俚还听点。”说着自往楼下去了。
善卿问双珠：“耐无(女每)来里说啥？”双珠道：“说双玉有点勿适意。”善卿道：“价末教耐去说俚两声，说啥嗄？”双珠道：“就为仔双宝多说多话。双宝也是匆好，要争气争匆来，再要装体面；碰着个双玉囗，一点点推扳勿起，两家头并仔堆末，弄勿好哉。”善卿道：“双宝装啥体面？”双珠道：“双宝来哚说：‘双玉无拨银水烟筒末，我房里拿得去拨来俚；就是俚出局衣裳，我也着过歇个哉。’刚刚拨来双玉听见仔，衣袋也（要勿）着哉，银水烟筒也勿要哉，今朝一日天团来哚床浪勿起来，说是匆适意。难末无(女每)拿双宝来反仔一泡，再要我去劝劝双玉，教俚起来。”善卿道：“耐去劝俚末说啥囗？”双珠道：“我也匆高兴去劝俚。我看仔双玉倒讨气。耐不过多仔几个局，一歇海外得来，拿双宝来要打要骂，倒好像是俚该来哚个讨人！”善卿道：“双玉也是利害点。耐幸亏勿是讨人，勿然俚也要看勿起耐哉。”双珠道：“俚搭我倒十二分要好。我说俚啥，俚总答应我，倒比仔无(女每)说个灵。”
正说着，只听得楼下阿德保喊道：“双玉先生出局。”楼上巧囡在对过房里接应道：“来个。”善卿便向双珠道：“用勿着耐去劝俚哉，俚要出局去，也只好起来。”双珠道：“我说俚勿起来末等俚歇，抵拚俚勿做生意末哉。故歇做清倌人，顺仔俚性子。隔两日才是俚世界哉（口宛）！”
道言未了，忽听得楼下周兰连说带骂，直骂到周双空房间里，便“劈劈拍拍”一阵声响，接着周双宝哀哀的哭起来，知道是周兰把双宝打了一顿。双珠道：“倪无(女每)也勿公道，要打末双玉也该应打一顿。双玉稍微生意好仔点，就稀奇煞仔，生意勿好末能概苦嗄！”善卿正要说时，适见巧囡从对过房里走来。双珠即问道：“反过仔一泡哉（口宛），为啥再打起来嗄？”巧囡低声道：“双玉出局勿肯去呀。三先生去说说囗，让俚去仔末好哉。”双珠冷笑两声，仍坐着不动身。
善卿忽立起来道：“我去劝俚，俚定归去。”即时踅过周双玉房间里，只见双玉睡在大床上，床前点一盏长颈灯台，暗昏昏的。善卿笑嘻嘻搭讪道：“阿是面有点勿适意？”双玉免不得叫声“洪老爷”。善卿便过去向床沿坐下，问道：“我听见耐要出局去（口宛）？”双玉道：“为仔勿适意，勿去哉。”善卿道：“耐来里勿适意，是（要勿）去个好。不过，耐勿去末，耐无(女每)也无啥法子，只好教双宝去代局。教双宝去代局，勿如原是耐自家去。我说阿对？”双玉一听双宝代局，心里自是发急，想了想道：“洪老爷说得勿差，我去末哉。”说着，已坐起来。善卿也自喜欢，忙喊巧囡过来点灯收拾。
善卿仍至双珠房里，把双玉肯去的话诉与双珠。双珠也道：“说得好。”正值阿金搬夜饭来，摆在当中间方桌上。善卿道：“耐也吃饭罢，舒齐仔末也好出局去哉。”双珠道：“耐阿要吃仔回了去吃酒？”善卿道：“我先去哉，（要勿）吃。”双珠道：“耐就来叫末哉。倪吃仔饭捕面，快煞个。”
善卿答应了，自去尚仁里卫霞仙家赴宴。双珠随至当中间坐下，却叫阿金去问双玉，说：“吃得落末，一淘来吃仔罢。”
双玉听见双宝挨打，十分气恼本已消去九分；又见阿姐特令娘姨来请吃饭，便趁势讨好，一口应承。欢欢喜喜出来，与双珠对坐，阿金、巧囡打横，四人同桌吃饭。吃饭中间，双珠乃从容向双玉说道：“双宝一只嘴无拨啥清头，说去看光景，我见仔俚也恨煞个哉。耐是匆比得双宝，生意未好，无(女每)也欢喜耐，耐就看过点。双宝有啥闲话听勿进，耐来告诉我好哉，（要勿）去搭无(女每)说。”双玉听了，一声儿不言语。双珠又微笑道：“阿是耐只道仔我帮仔双宝哉？我倒勿是帮双宝，我想倪故歇来里堂子里，大家不过做个倌人，再歇两年，才要嫁人去哉。来里做倌人辰光，就算耐有本事，会争气，也见谅得势。实概一想，阿是推扳点好哉？”双玉也笑答道：“故是阿姐也多心哉。我人末笨，闲话个好邱听匆出仔也好煞哉！阿姐为好了搭我说，我倒怪仔阿姐，阿有啥实概个嗄？”双珠道：“只要耐心里明白，就蛮好。”
说着，都吃毕饭。巧囡忙催双玉收拾出局，双珠也自捕起面来。约至九点多钟，方接到洪善卿叫局票头。另有一张票头叫双玉，客人姓朱，也叫到卫霞仙家，料道是同台面了。双珠却不等双玉，下楼先行。正在门前上轿，恰遇双玉回来，便说与他转轿同去。到了卫霞仙家台面上，洪善卿手指着一个年轻后生，向双玉说：“是朱五少爷叫耐。”双玉过去坐下。
双珠见席上七客，主人姚季莼之外，乃是李鹤汀、王莲生、朱蔼人、陈小云等，都是熟识；只有这个后生面生，暗问洪善卿，始知是朱蔼人的小兄弟，号叫淑人，年方十六，没有娶亲。双珠看他眉清目秀，一表人材，有些与朱蔼人相像。只是羞怯怯的坐在那里，局促不安，巧囤去装水烟也不吸。巧囡便去给王莲生装水烟。
当时姚季莼要和朱蔼人豁拳。朱蔼人坐在朱淑人上首，朱淑人趁豁拳时偷眼去看周双玉。不料双玉也在偷看，四只眼睛刚刚凑一个准。双玉倒微微一笑，淑人却羞得回过头去。
